Stækkun verksmiðju Actavis í Hafnarfirði er á áætlun

Framkvæmdir við stækkun lyfjaverksmiðju Actavis í Hafnarfirði ganga samkvæmt áætlun. Gert er ráð fyrir að hefja framleiðslu í nýja hlutanum um áramót. Við stækkunina eykst framleiðslugetan á Íslandi um 50%, eða í um einn og hálfan milljarð taflna á ári.

Jón Gunnar Jónsson, framkvæmdastjóri Actavis hf á Íslandi, segir mikilvæga þætti í ferlinu þegar frágengna.

"Við höfum skrifað undir samninga um kaup á öllum tækjabúnaði fyrir stækkunina og miðum við að hann verði afhentur fljótlega í haust. Það er reiknað með að uppsetning og svokölluð gilding á búnaðinum taki um 2-3 mánuði - þetta er flókinn tækjabúnaður sem þarf að uppfylla ýtrustu kröfur til lyfjaframleiðslu. Stækkunin er mjög mikilvæg fyrir starfsemina á Íslandi bæði til að sinna þeirri eftirspurn sem er eftir vörum frá fyrirtækinu og einnig til að styrkja stöðu fyrirtækisins til framtíðar og þá með möguleika til að sinna enn fjölbreyttari framleiðslu," segir Jón Gunnar í tilkynningu um málið.

Jón Gunnar segir að um 15-25 iðnaðarmenn hafi unnið að stækkuninni að staðaldri, auk þess sem fimm arkítekta- og verkfræðistofur komi að hönnun húsnæðisins. Þá sé ótalið vinnuframlag starfsmanna Actavis vegna stækkunarinnar, en þeir búa yfir sérþekkingu á lyfjaiðnaði sem fáir hafa á Íslandi. Ekki hefur þurft að kaupa sérhæfða ráðgjöf erlendis frá til að sinna verkefninu.

Lyfjaverksmiðjan í Hafnarfirði hefur verið keyrð á hámarksafköstum síðustu misserin og er hún þegar fullbókuð fram á næsta ár. Undir venjulegum kringumstæðum má reikna með fyrirliggjandi pöntunum til þriggja mánaða, en nú eru staðfestar pantanir fram í febrúar á næsta ári. Um 95% framleiðslunnar eru flutt út, en útflutningur lyfjavara var um 2,4% af heildarvöruútflutningi landsmanna á síðasta ári.

Í maí var vöktum í verksmiðjunni fjölgað úr þremur í fjórar og starfsfólki bætt við í pökkun og töfluslætti, auk þess sem ráðið hefur verið í störf á gæðasviði. Starfsfólki verður enn fjölgað á næstu mánuðum í fyrrnefnd störf og á fleiri sviðum í tengslum við stækkunina. Reiknað er með að starfsmönnum í verksmiðjunni fjölgi um 50 á þessu ári og og er þegar búið að ráða um 30 manns á árinu.

Lyfjaverksmiðjur Actavis eru alls 18 talsins í 13 löndum. Ákvörðunin um að stækka íslensku verksmiðjuna til að bregðast við aukinni eftirspurn ræðst m.a. af því að ekki hlýst kostnaður eða tafir af því að flytja framleiðslu lyfja annað. Slíkt getur tekið um tvö ár og kallar á viðamiklar skráningarbreytingar í þeim löndum þar sem lyfin eru seld.