Mikill verðmunur á fiski eftir verslunum

Munur á hæsta og lægsta verði á fiski var í flestum tilfellum um eða yfir 50% þegar Verðlagseftirlit ASÍ gerði verðsamanburð á ferskum fiski í fiskbúðum og stórmörkuðum á höfuðborgarsvæðinu og á Akureyri á mánudag.

Skoðaðar voru 29 tegundir af fiskmeti. Lægsta verðið var oftast að finna í Litlu fiskbúðinni Miðvangi, eða í 13 tilvikum af 29. Fjarðarkaup var með lægsta verðið í 7 tilvikum af 29 en verslanirnar eru báðar staðsettar í Hafnarfirði. Hæsta verðið var oftast í Kjöt og fisk Bryggjuhúsinu Höfðabakka eða í 7 tilvikum af 29. Munur á lægsta og hæsta verði var frá 35% upp í 155%.

Mikill munur var á vöruúrvali í þeim verslunum sem farið var í. Flestar vörurnar í könnunni voru fáanlegar í Hafberg í Gnoðavogi en þar fengust allar 29 tegundirnar. Fiskbúðin Trönuhrauni átti 28 tegundir og Heimur Hafsins á Akureyri var með 27 tegundir.