Lilja spyr um ábyrgð á efnahafsstefnunni eftir AGS-fund

Lilja Mósesdóttir, þingmaður Vinstri grænna, spyr hver beri ábyrgð á efnahagsstefnunni eftir að hún átti fund með Julie Kozack nýjum yfirmanni sendinefndar Alþjóðagjaldeyrissjóðsins (AGS) og Mark Flanagan í höfuðstöðvum AGS.

Lilja fjallar um málið á Facebook síðu sinni og segir: „Ég var mest hissa á því hversu sammála við vorum og fór því að velta fyrir mér hver bæri eiginlega ábyrgð á efnahagsstefnunni á Íslandi?"

Lilja ræddi við þau Kozack og Flanagan um gagnrýni sína á stefnu AGS á Íslandi. Þau hafi hlustað á rök Lilju fyrir því að fara hægar í niðurskurðinn, leiðrétta skuldir lítilla fyrirtækja og heimila og afnema verðtryggingu skulda. Þar að auki að hagvöxtur yrði að byggja á aukinni eftirspurn og framleiðslu vara og þjónustu fyrir erlendan og innlendan markað.

Fundurinn átti sér stað í vikunni en sem kunnugt er af fréttum hefur Lilja lengi verið þeirrar skoðunar að Ísland eigi að segja upp samstarfi við Alþjóðagjaldeyrissjóðinn. Steingrímur J. Sigfússon, fjármálaráðherra og formaður Vinstri grænna , vill hinsvegar halda samstarfinu áfram þar til áætlun AGS fyrir Ísland lýkur um mitt næsta ár.