Reiknar með stöðugri krónu fram að áramótum

Fjallað er um málið í Morgunkorni greiningarinnar. Þar segir að rólegt hefur verið á millibankamarkaði með gjaldeyri það sem af er októbermánuði og hafa viðskipti með gjaldeyri verið afar strjál, sem er í takti við þróunina undanfarin misseri.

Þannig nemur heildarveltan á millibankamarkaði frá 1. til og með 25. október 1.477 milljónum kr. og þar af eru viðskipti Seðlabanka Íslands 699 miljónir kr., eða sem jafngildir rétt rúmlega 47% af heildarveltunni. Bendir þetta til þess að veltan verði nokkuð minni í þessum mánuði en í síðasta mánuði þegar hún var 2.594 milljónum kr., en kaup Seðlabankans með gjaldeyri voru þá um 53% af heildarveltunni.

Jafnframt er þetta mun minni velta en í október í fyrra en þá nam heildarveltan á millibankamarkaði tæpum 8 milljörðum kr. og var því ríflega fimmfalt meiri en veltan hefur verið þennan mánuðinn.

Nú kostar evran á innlendum millibankamarkaði um 155 kr. sem er svipað og hún kostaði í byrjun októbermánaðar. Jafnframt hefur Bandaríkjadollar á fyrrnefndum markaði lítið breyst það sem af er mánuðinum og kostar nú rúmar 112 kr., en sú veiking sem átti sér stað á dollar um miðjan mánuðinn hefur komið nokkuð til baka. Gengisvísitala krónunnar, sem vegur saman verð gjaldmiðla helstu viðskiptaþjóða Íslands gagnvart krónunni, stendur í 205,7 sem er svipað gildi og hún stóð í byrjun mánaðarins.

„Við teljum að sem stendur sé ekki mikil innistæða til styrkingar krónunnar á næstu vikum. Má hér nefna að horfur er minna innflæði ferðamannagjaldeyris á næstunni og jafnframt meira útflæði vegna lánahreyfinga. Í því samhengi má benda vaxtagreiðslur vegna erlendra lána Orkuveitunnar og annarra opinberra aðila. Auk þess kunna regluleg kaup Seðlabankans á gjaldeyri að hafa áhrif þrátt fyrir að bankinn leitist við að haga kaupunum með þeim hætti að áhrif þeirra verði sem minnst á gengi krónunnar," segir í Morgunkorninu.