Meiri loðna margra milljarða búbót

Leiðangrar skipa Hafrannsóknastofnunar í haust leiða í ljós að útbreiðsla loðnu er mun meiri en búist var við og vísbendingar eru um að magn ungloðnu sé mun meira en mælst hefur í mörg ár. Meira fannst einnig af eldri loðnu miðað við undanfarin ár. Hafrannsóknastofnun segir þessar niðurstöður benda til að ástand loðnustofnsins og horfur í loðnuveiðum séu betri en verið hefur um nokkurt skeið.

Í sjávarútvegi áætla menn út frá tilkynningu Hafrannsóknarstofnunar að búast megi við tvö til þrjúhundruð þúsund tonna loðnuvertíð. Hún gæti skilað tíu til fimmtán milljarða króna útflutningsverðmæti, allt að átta milljörðum meira en í fyrra.