Bankar og lífeyrissjóðir enn á móti flatri niðurfellingu skulda

Hagsmunaaðilar komu saman til samráðsfundar í Þjóðmenningarhúsinu í dag, þar sem skýrsla sérfræðingahóps forsætisráðuneytisins um skuldavanda heimilanna var rædd.

Höskuldur H. Ólafsson, bankastjóri Arion, sagði þetta að loknum fundinum „Það er bara verið að velta upp mörgum leiðum, nú þarf að horfa á hvaða leið eru færar." Spurður hvort bankinn útiloki almenna aðgerðir sagði Höskuldur: „Já, okkur finnst það liggja í augum uppi að það sé ekki sú leið sem á að fara"

„Við viljum skoða þessa sértæku leið og bæta hana. Bankarnir hafa boðið 110% leið og hún hefur verið í boði og auðvitað viljum við skoða vaxtabæturnar," sagði Birna Einarsdóttir, bankastjóri Íslandsbanka.

„Við höfum ekki tekið afstöðu, nema lýst andstöðu við flata niðurfellingu, en við erum tilbúin að skoða aðra þætti sem eru ekki útgjaldamiklir, en umfram allt verður að gæta þess að allar eignir lífeyrissjóðanna eru réttindi sjóðfélaga," sagði Arnar Sigurmundsson, formaður Landssamtaka lífeyrissjóða að loknum fundi.