Norðmenn opna olíuleitar­svæði á Jan Mayen-hrygg

Norska ríkisstjórnin hefur ákveðið að hefja undirbúning að opnun hafsvæðisins á Jan Mayen-hrygg fyrir olíuleit.

Tillaga að áætlun til mats á áhrifum olíuleitarstarfseminnar hefur nú verið send út til umsagnar af norska olíu- og orkuráðuneytinu. Liðin eru 16 ár frá því að Norðmenn hófu síðast að opna nýtt svæði fyrir olíuleit, og eru þetta því nokkur tíðindi almennt á sviði olíuleitar við Noreg.

Þetta kemur fram á vefsíðu Orkustofnunnar. Þar segir að þetta sætir tíðindum fyrir Íslendinga , því um er að ræða um 100.000 ferkílómetra svæði sem liggur til suðurs að Drekasvæðinu í íslenskri lögsögu.

Þar af eru um þriðjungur, eða 32.750 ferkílómetrar, innan samningssvæðis Íslendinga og Norðmanna um landgrunnið á milli Íslands og Jan Mayen. Á því svæði á Ísland rétt á 25% þátttöku í rannsóknum og vinnslu á olíu og gasi.