Verð á hótelgistingu lækkaði um 14% í sumar

Verð á hótetgistingu á Íslandi hefur lækkað um 14% í sumar miða við sumarið í fyrra og gætir þar að mestu áhrifa frá eldgosinu í Eyjafjallajökli.

Þetta kemur fram á vefsíðunni Hotel.com þar sem verðþróun á hótelgistingu í heiminum er mæld reglulega. Lækkunin á Íslandi er sú mesta hvað Evrópuþjóðir varðar en í kynningu á könnun Hotel.com segir að verð á hótelgistingu sé ætíð háð staðarháttum í hverju landi á hverjum tíma.

Þannig er nefnt sem dæmi að verð á hótelgistingu í Cape Town í Suður-Afríku hafi hækkað um 54% milli ára vegna heimsmeistarakeppninar í fótbolta sem haldin var í landinu síðasta sumar. Á meðan hafi verð á hótelgistingu á Íslandi lækkað um 14% þökk sé gosinu í Eyjafjallajökli.

Af öðrum Evrópuþjóðum lækkaði verð á gistingunni næstmest í Rússlandi eða um 10% og í þriðja sæti kemur Danmörk með lækkun upp á 7% milli ára.

Fram kemur á vefsíðunni að könnun þeirra nær til 120.000 hótela um allan heiminn en þessi könnun hefur verið gerð á hverju ári undanfarin sex ár.