Bankastjóri Landsbankans segir flöskuhálsinn hjá hinu opinbera

Bankastjóri Landsbankans segir gagnrýni forsætisráðherra um úrræði bankanna ómaklega og hafnar því alfarið að bankarnir hafi brugðist skuldurum. Sértæk skuldaaðlögun sé úrræði sem sé flókið og langt, það útskýri hversu fáir hafi fengið úrlausn.

Jóhanna Sigurðardóttir, forsætisráðherra, gagnrýndi bankana fyrir aðgerðaleysi í stefnuræði sinni í gær. Forsætisráðherra vitnaði til þess í ræðu sinni að í lok ágúst hefðu aðeins 128 einstaklingar fengið sértæka skuldaaðlögun hjá bönkunum.

„Ég verð að segja í hreinskilni að hinir nýju bankar hafa valdið mér vonbrigðum þegar kemur að skuldaaðlögun fólks og fyrirtækja. Samið var við fjármálastofnanir um að þær kæmu til móts við viðskiptavini sína með sértækri skuldaaðlögun á grundvelli laga. (...) Bankarnir hafa dregið lappirnar þegar kemur að því að leysa úr stöðu einstaklinga sem eru að komast í þrot. Við þetta verður einfaldlega ekki unað og stjórnvöld hljóta að fara fram á skýringar og úrbætur."

Birna Einarsdóttir, bankastjóri Íslandsbanka, segir það mikla einföldun hjá forsætisráðherra að benda bara á bankana þegar kemur að meintu aðgerðarleysi í skuldavanda heimilanna. Hún segir hins vegar sértæka skuldaðlögun ganga of hægt, það sé þó vegna þess að löggjafinn þurfi að rýmka reglurnar.

Steinþór Pálsson, bankastjóri Landsbankans, segir gagnrýni forsætisráðherra ómaklega. Flöskuhálsinn vegna sértækrar skuldaðlögunar sé m.a hjá hinu opinbera. Hann segir gagnrýni forsætisráðherra ómaklega og ósanngjarna.