Eignir Jóns Ásgeirs og Hannesar Smárasonar kyrrsettar

Eignir Jóns Ásgeirs Jóhannessonar og Hannesar Smárasonar á Íslandi verða kyrrsettar í tengslum við rannsókn skattayfirvalda á þeim tveimur og félögum sem þeir stjórnuðu. Frá þessu er greint í Viðskiptablaðinu sem kemur út á morgun. Samkvæmt heimildum blaðsins eru eignirnar sem kyrrsettar verða taldar mörg hundruð milljóna króna virði.

Heimildir Viðskiptablaðsins herma að eignir fleiri úr hópi hinna svokölluðu útrásarvíkinga muni verða kyrrsettar af skattayfirvöldum á næstunni. Blaðið segir að þær heimildir rími við orð Steingríms J. Sigfússonar fjármálaráðherra að loknum ríkisstjórnarfundi síðastliðinn föstudag.

Þar var Steingrímur spurður hvort hann ætlaði að aðhafast eitthvað til að koma í veg fyrir að helstu gerendur í efnahagshruninu kæmust yfir fyrirtæki sín að nýju. Steingrímur svaraði því til að skattrannsóknaryfirvöld væru í viðamiklum rannsóknum sem tengdust mörgum þessara sömu aðila og það væri ekkert ólíklegt að skatturinn yrði á undan að hefja mál og jafnvel kyrrsetja eignir.