Icelandair væntir mikils af Bachelorette

Í kvöld, 21. júní, verður sýndur á bandarísku sjónvarpsstöðinni ABC, fimmti þáttur úr nýrri röð The Bachelorette, sem að mestu gerist á Íslandi. Þessi þáttaröð nýtur mikilla vinsælda vestan hafs og þátturinn í síðustu viku var sá þáttur á kjörtíma í bandarísku sjónvarpi sem fékk mest áhorf allra það kvöld.

Starfsfólk á svæðisskrifstofu Icelandair í Boston í Bandaríkjunum hafði veg og vanda af því að fá framleiðendur þáttanna til þess að taka þennan þátt upp á Íslandi með Ferðamálaráði, Iceland Naturally og samtarfsaðilum í ferðaþjónustu. Þátttakendur urðu m.a. vitni að gosinu í Fimmvörðuhálsi þegar þeir dvöldu hér á landi í vor.

"Þegar okkur hefur áður tekist að koma á svona samvinnu við framleiðendur vinsælla sjónvarpþátta og kvikmynda, hefur það skilað góðum árangri. Þar má nefna þátt í Amazing Race fyrir nokkru, og Hollywoodmyndina Journey to the Center of the Earth, þar sem Ísland og Icelandair komu einnig við sögu. Þessir þættir eru ekki bara sýndir í Bandaríkjunum, heldur um allan heim og fara langtum víðar en það kynningarefni sem framleitt er af okkur sjálfum. Þátturinn í kvöld mun vonandi skila jafn góðum eða enn betri árangri, " segir Helgi Már Björgvinsson, framkvæmdastjóri sölu- og markaðssviðs Icelandair.