Segir óþarft að banna notkun transfitusýra

Opinber íhlutun vegna notkunar transfitusýra í matvælum er óþörf, segir Vilhjálmur Þorláksson, framkvæmdastjóri Gæðabaksturs, í samtali við Vísi. Gæðabakstur framleiðir meðal annars ömmukleinur og kleinuhringi.

Vilhjálmur segir að Gæðabakstur hafi unnið að því í gegnum árin að hafa framleiðslu sína eins fitulitla og hægt er. „Við erum með transfitulausa feiti núna sem við erum að prófa," segir Vilhjálmur. Spurningin sé bara hvaða feiti eigi að nota. Valið standi á milli kókosfeiti og jurtafeiti. „Gæðabakstur er að vinna í því að finna rétta feiti sem samræmast því bragði og þeim gæðum sem við höfum hingað til staðið fyrir," segir Vilhjálmur. Niðurstaða verði væntanlega komin um áramót. „Við höfum verið að nota þessa kókosolíu og okkur líst svolítið vel á hana," segir Vilhjálmur.

Í samtali við Vísi á mánudag sagðist landlæknir styðja hugmyndir þess efnis að notkun transfitusýra yrði bönnuð. Sjávarútvegs- og landbúnaðarráðherra setti svo reglugerð þessa efnis í gær að notkun slíkrar fitu yrði takmörkuð. Myllan hefur sent frá sér tilkynningu þar sem fram kemur að allar vörur Myllunnar innihalda undir 1% af transfitusýrum, og hafa verið undir 2% í hið minnsta fjögur ár.