Eignarnám HS orku nánast út af borðinu

Ólíklegt er að starfshópur ríkisstjórnarinnar um eignar­hald á orkufyrirtækjum geti komist að þeirri niðurstöðu sem stjórnin lagði honum í hendur.

Hverfandi líkur eru á að hópurinn leggi til að ríkið taki HS-orku eignarnámi af eigandanum, Magma Energy og ljón eru í vegi þess að hann geti með góðu móti lagt til takmörkun eignarhalds einkafyrirtækja.

Starfshópurinn var skipaður í kjölfar þess pólitíska óróa sem varð í framhaldi kaupa Magma á HS-orku. Voru skipun hans og verkefni liður í lempun óánægðra stjórnarþingmanna, einkum úr röðum vinstri grænna.

Starfshópnum var gert að undir­búa lagafrumvarp sem tryggði opinbert eignarhald á mikilvægum orkufyrirtækjum og takmarkaði eignarhald einkafyrirtækja. Átti hann að vera búinn að skila af sér og stefndi ríkisstjórnin að því að leggja fram frumvarp um málið fyrir októberlok. Þau áform gengu ekki eftir.

Samkvæmt heimildum Fréttablaðsins eru þau meginsjónarmið uppi í starfshópnum að fara beri eftir niðurstöðum nefndar sem yfirfór viðskiptin með HS orku. Hún mat þau lögmæt og lagði ekki til eignarnám. - bþs