Iceland Airwaves skilaði rúmum 300 milljónum

Erlendir gestir sem komu hingað til lands vegna Iceland Airwaves hátíðarinnar í ár vörðu samtals 313 milljónum króna í Reykjavík á meðan dvöl þeirra stóð.

Þetta eru niðurstöður könnunar sem Útflutningsskrifstofa íslenskrar tónlistar vann í samstarfi við Höfuðborgarstofu. Í þessari tölu er ekki meðtalinn kostnaður við flug til landsins eða önnur útgjöld utan borgarinnar. Niðurstöður sýna að hver erlendur gestur eyddi að meðaltali 25 þúsund krónum á dag í Reykjavík.

Í könnuninni voru gestirnir beðnir um að leggja mat sitt á hversu miklu þeir vörðu í gistingu, mat og veitingastaði, næturlíf, samgöngur, verslun og svo framvegis. Kostnaður vegna flugs þeirra hingað til lands er áætlaður um eða yfir 130 milljónir.

Samkvæmt fréttatilkynningu frá ÚTÓN var sambærileg könnun gerð árið 2005. Þá kom í ljós að erlendu gestirnir eyddu um 185 milljónum króna, eða um 260 milljónum miðað við verðlag nú. Er aukningin því um 22% þegar tillit er tekið til vísitölu neysluverðs.