Endurheimtur Landsbankans nema 93% af forgangskröfum

Endurheimtur Landsbanka Íslands í erlendri mynt nema 93% af forgangskröfum, en vegna mikillar hækkunar íslensku krónunnar á tímabilinu eru endurheimtur í þeirri mynt áætlaðar 86% þann 30. september síðastliðinn.

Heildareignir bankans voru metnar á 1.138 milljarða króna þann 30. september síðastliðinn, en voru metnar á 1.100 milljarða króna þann 30. apríl 2009. Reiðufé innheimtist hraðar en fyrri áætlanir bankans gerðu ráð fyrir. Samkvæmt áætlunum bankans í byrjun árs 2010 var gert ráð fyrir að reiðufé næmi um 319 milljörðum króna í árslok sem jafngildir um 286 milljörðum króna á gengi 30. september síðastliðins. Reiðufé bankans í lok september síðastliðnum nam um 293 milljörðum króna, eða hærri fjárhæð en áætlað var í ársbyrjum að staða reiðufjár væri í árslok.