Hreiðar Már og Kristján Ara sleppa líklega undan ábyrgð

Allt útlit er fyrir að Hreiðar Már Sigurðsson, Kristján Arason og fleiri yfirmenn í Kaupþingi sleppi undan persónulegri ábyrgð vegna hlutabréfakaupa þar sem eignarhaldsfélög þeirra utan um bréfin voru stofnuð nógu snemma til að erfitt verði að rifta flutningnum. Búast má við að öðrum yfirmönnum sem stofnuðu félög sín síðar verði stefnt í haust náist ekki samkomulag um greiðslu.

Nokkrir starfsmenn Kaupþings færðu skuldir sínar við bankann vegna hlutabréfakaupa úr persónulegri eigu í einkahlutafélög. Nær einu veðin fyrir skuldunum voru bréfin sjálf. Slitastjórnin hefur undanfarið unnið að því að rifta þessum ráðstöfunum að því er fram kom í tilkynningu í vor. Samkvæmt gjaldþrotalögunum er erfitt að rifta flutningi yfir í einkahlutafélög ef flutningurinn átti sér stað meira en sex mánuðum fyrir þrot. Allt útlit er því fyrir að eftirtaldir aðilar sleppi undan persónulegri ábyrgð.

Hreiðar Már Sigurðsson, fyrrverandi forstjóri Kaupþings. Hann stofnaði sitt félag árið 2006. Félagið skuldaði bankanum tæpa sex milljarða króna við hrunið að því er fram kemur í skýrslu rannsóknarnefndar Alþingis.

Þórarinn Sveinsson, fyrrverandi framkvæmdastjóri eignastýringar bankans. Hann flutti hlutabréfaeign sína í félagið THSV sem var stofnað árið 2006. Það skuldaði bankanum rúmar 900 milljónir við hrunið og er nú gjaldþrota.

Kristján Arason, fyrrverandi framkvæmdastjóri viðskiptabankasviðs, setti sína hlutabréfaeign í félagið 7 hægri ehf sem skuldaði bankanum rúman 1,8 milljarð króna við hrunið. Félagið var stofnað í febrúar 2008.

Aðrir yfirmenn færðu hlutabréfaeign sína og lán yfir í einkahlutafélög innan við hálfu ári frá hruni bankans. Búast má við að mál gegn þeim verði þingfest nú í haust náist ekki samkomulag um greiðslu. Þetta eru m.a.:

Ingvar Vilhjálmsson, fyrrverandi framkvæmdastjóri markaðsviðskipta. Hann stofnaði eignarhaldsfélag í sömu viku og bankinn var þjóðnýttur og færði hlutabréfaeign sína þangað. Félagið skuldaði bankanum rúma 5,7 milljarða í lok árs 2008.

Guðni Níels Aðalsteinsson, fyrrverandi yfirmaður fjárstýringar. Félag hans RST ehf. var stofnað í júní 2008. Það skuldaði bankanum tæpan 1,3 milljarða króna í árslok 2008.



Uppfært 17. desember 2013:

Ranghermt var í fréttinni að Þórarinn Sveinsson hefði fært bréf sín yfir í félagið THSV. Félagið var stofnað árið 2006 og keypti bréf í Kaupþingi á markaði þann 12. apríl 2007. Ekki var því um færslu bréfa að ræða. Félagið greiddi auk þess aldrei arð til eiganda.