Gjaldeyrissakamál hugsanlega í uppnámi vegna lagaklúðurs

Gjaldeyrisreglur Seðlabankans voru ekki birtar með réttum hætti fyrr en í október síðast liðnum og voru því óskuldbindandi, að mati hæstaréttarlögmanns.

Ef það verður niðurstaða dómstóla gæti það haft áhrif á fjölda mála þar sem menn eru grunaðir um að brjóta gegn höftunum.

Reimar Pétursson, hæstaréttarlögmaður, hefur skrifað grein um gjaldeyrisreglur Seðlabankans í nýjasta tölublað Lögmannablaðsins sem kemur út í desember næstkomandi. Reimar telur að gjaldeyrisreglurnar hafi ekki verið réttilega birtar þangað til í október síðastliðnum og þar með hafi þær verið óskuldbindandi fyrir þann tíma, þar sem samþykki ráðherra sem var skilyrði fyrir gildistöku reglnanna var ekki réttilega birt fyrr en þá að hans mati.

„Það er þannig samkvæmt lögunum að gildi reglnanna er háð því að ráðherra samþykki að þær séu gerðar. Svo þarf að birta reglurnar til þess að þau taki gildi, en ég fæ ekki séð að samþykki ráðherra hafi verið birt í stjórnartíðindum og því binda reglurnar ekki borgarana," segir Reimar.

Hægt er að setja þetta í samhengi við fjöldann allan af málum sem hafa verið til rannsóknar vegna gruns um brot á gjaldeyrisreglunum.

Þar má til dæmis nefna umfangsmikið mál handboltakappans Markúsar Mána Michaelssonar og viðskiptafélaga hans, en efnahagsbrotadeild ríkislögreglustjóra framkvæmdi húsleitir í janúar síðastliðnum vegna málsins.

„Það myndi sega mér að öll slík mál væru tilhæfulaus," segir Reimar Pétursson. Hann segir að fleiri vankantar séu á gjaldeyrisreglunum því dómafordæmi séu fyrir því að löggjafinn geti ekki framselt til lægra sett stjórnvalds almennt vald til að setja refsiheimildir, eins og sé tilviki gjaldeyrisreglna Seðlabankans.