Vaxandi tiltrú á að ríkissjóður ráði við erfiða stöðu sína

Margar vísbendingar benda til að markaðurinn hafi vaxandi tiltrú á því að ríkissjóður muni ráða við erfiða stöðu sína.

Þetta kemur fram í Markaðsfréttum Íslenskra verðbréfa. Þar segir að flökt á gengi krónunnar hefur minnkað verulega á árinu og er enn að minnka og virðist Seðlabankinn hafa góða stjórn á genginu. Gengi krónunnar hefur sveiflast á þröngu bili síðan snemma í október.

Svipaða sögu er að segja af skuldatryggingaálaginu á ríkissjóð, það hefur lækkað nær stöðugt það sem af er ári og stendur í um 273 punktum.

Viðskipti með skuldabréf ríkissjóðs í evrum sem eru á gjalddaga í desember á næsta ári hafa verið á ávöxtunarkröfu undir 6% síðan í ágúst og er það veruleg lækkun frá því sem hæst var á árinu. Seðlabankinn hefur reyndar verið kaupandi að þessum bréfum sem hefur stutt við kröfulækkunina.

Allt eru þetta vísbendingar um vaxandi tiltrú á því að ríkissjóður muni ráða við erfiða stöðu. Náist hagstæður samningur í Icesave málinu á næstu vikum ætti það að geta haft veruleg áhrif á þau atriði sem nefnd hafa verið.