Telur að verðbólgumarkmið Seðlabankans náist fyrir áramót

Greining Arion Banka telur að verðbólga verði komin undir 2,5% verðbólgumarkmið Seðlabankans fyrir árslok. Þetta kemur fram í Markaðspunktum greiningarinnar.

Í Markaðspunktunum er fjallað um nýja verðbólgumælingu Hagstofunnar en engin verðlagshækkun mældist milli mánaða í september og lækkaði því tólf mánaða verðbólga í 3,7% samanborið við 4,5% í ágúst.

Verðbólgan reyndist því undir væntingum en spár helstu greiningaraðila lágu á bilinu 0,3-0,4%. Greiningardeild Arion banka spáði 0,3% verðbólgu.

„Margir ólíkir undirliðir neysluverðsvísitölunnar lækkuðu að þessu sinni sem sýnir að ekki er um neina tilviljun að ræða, heldur eru styrking krónunnar og takmörkuð eftirspurn að skila sér inn í verðlagið. Við teljum að sú þróun muni halda áfram næstu mánuði þótt gjaldskrárhækkun Orkuveitunnar í nóvember næstkomandi setji að sjálfsögðu nokkurt strik í reikninginn," segir í Markaðspunktunum.

„Við teljum engu að síður að verðbólga verði komin undir 2,5% verðbólgumarkmið Seðlabankans fyrir árslok. Jafnframt gerum við ráð fyrir að verðbólga verði undir markmiði á árinu 2011."

Greiningin gerir ráð fyrir 0,8% hækkun verðlags fram til ársloka og vegur þar þyngst væntanleg hækkun Orkuveitunnar í nóvember n.k. eða um 0,39% til hækkunar verðlags. Af öðrum þáttum má nefna að matvöruverð gæti skriðið uppávið næstu mánuði, m.a. vegna hækkana á ýmsum hrávörum.