Viðskipti innlent

Rekstur Garðabæjar skili 165 milljóna afgangi næsta ár

Álögur á íbúa í Garðabæ verða áfram lágar á árinu 2011, skv. frumvarpi að fjárhagsáætlun bæjarins sem lagt var fram til fyrri umræðu í bæjarstjórn í gær. Útsvar verður óbreytt, eða 12,46%, sem er með því lægsta sem gerist hjá íslenskum sveitarfélögum. Gert er ráð fyrir jákvæðri rekstrarniðurstöðu að fjárhæð 165 milljónir kr.

Þetta kemur fram í tilkynningu frá bæjarstjórn. Þar segir að fjárhagsáætlun Garðabæjar fyrir árið 2011 ber með sér sterka fjárhagsstöðu bæjarins. Garðabær nýtur þess í ríkum mæli að skuldir og skuldbindingar eru hóflegar.

Í fjárhagsáætlun er gert ráð fyrir því að langtímaskuldir verða greiddar niður um tæplega 400 milljónir kr. á árinu 2011 og að framkvæmdir á árinu, fyrir allt að 580 milljónir kr., verði fjármagnaðar án lántöku. Stærstu framkvæmdir ársins eru bygging leikskóla í Akrahverfi í Garðabæ og bygging hjúkrunarheimilis á Sjálandi.

Útgjöld til félagsþjónustu hækka um 4,9% frá árinu 2010. Liðir eins og fjárhagsaðstoð, þjónusta við aldraða og húsaleigubætur eru hækkaðir til að mæta aðstæðum í samfélaginu. Einnig hækkar rekstrarkostnaður Jónshúss vegna góðrar aðsóknar eldri borgara og þátttöku í því starfi sem þar er boðið upp á.





Mest lesið


Fleiri fréttir

Sjá meira


×

Mest lesið