Eignir innlánsstofnana lækkuðu um 60 milljarða

Heildareignir innlánsstofnana námu 2.861 milljörðum kr. í lok september 2010 og lækkuðu um 59,8 milljarða kr. frá fyrri mánuði. Innlendar eignir lækkuðu um 76,8 milljarða kr en erlendar eignir hækkuðu um 17 milljarða kr.

Þetta kemur fram í hagtölum Seðlabankans. Þar segir að heildarskuldir innlánsstofnana námu 2.510 milljörðum kr. í lok september. og lækkuðu um 35,8 milljarða kr. á milli mánaða. Innlendar skuldir hækkuðu um 33,4 milljarða kr. en erlendar skuldir lækkuðu um 69,2 milljarða kr. Eigið fé innlánsstofnana nam í lok september 351 milljarða kr. lækkaði um 24 milljarða kr. frá fyrra mánuði.

Útlánasafn nýju bankanna er metið kaupvirði þ.e. því virði sem þessir aðilar keyptu útlánasafnið á. Kaupvirðið er það virði sem vænt er að muni innheimtast af útlánunum. Virði útlánasafnsins endurspeglar því ekki skuldastöðu viðskiptavina.

Vegna bankahrunsins í október 2008 hefur Seðlabankinn ekki haft tök á að birta heildstæðar tölur yfir íslenskt bankakerfi frá þeim tíma. Undanfarið hefur verið unnið að því að vinna upp skýrslur frá október 2008. Nú liggja fyrir bráðabirgðagögn fyrir desember 2008, desember 2009 og tímabilið janúar - september 2010 í fullri sundurliðun.

Upplýsingarnar byggja á gögnum frá bönkum og sparisjóðum eins og þau liggja fyrir á hverjum tíma. Þar sem töluverð óvissa ríkir um mat á eignum í kjölfar bankahrunsins kunna gögnin að breytast eftir því sem áreiðanlegra verðmat verður til, að því er segir í hagtölunum.