IFS greining spáir góðu uppgjöri hjá Marel

IFS greining spáir góðum þriðja fjórðungi hjá Marel en uppgjörið verður birt á morgun, miðvikudag. Samkvæmt spánni verður salan á fjórðungnum um 18% meiri en á sama fjórðungi í fyrra.

Í tilkynningu segir að IFS spáir um 10,9% EBIT framlegð á fjórðungnum. Sú framlegð er eilítið lægri en á öðrum ársfjórðungi.

„Þessi spá fyrir þriðja ársfjórðung byggir m.a. á upplýsingum um pantanabók félagsins sem birt var í fyrsta sinn í uppgjöri fyrsta ársfjórðungs í ár. Pantanabókin styrktist í síðasta fjórðungi og nam 125 milljónum evra í lok fjórðungsins," segir IFS greining.

„Nýjar pantanir voru áfram umfram afgreiddar pantanir á síðasta fjórðungi. Þessar upplýsingar gefa vísbendingu um sölu þriðja og fjórða ársfjórðungs. Við reiknum með að sumarleyfistíminn á þriðja ársfjórðungi muni setja eitthvert mark sitt á söluna eins og oftast gerist."

Þá segir að nýjar tölur um pantanastöðu Marel eru líkt og áður mikilvægar til að sjá hvernig félaginu getur vegnað á næstu fjórðungum. Auk þess verður mikilvægt að heyra hvort félagið nær að endurfjármagna skuldir félagsins. Núverandi kjör á vaxtaberandi skuldum eru fremur óhagstæð og því er mikið í húfi fyrir félagið að ná fram bættum kjörum.

„Marel hefur nú þegar gefið út að það sé í viðræðum við banka um endurfjármögnun. Einnig verður fróðlegt að heyra hvort fréttir verði af mögulegri tvíhliða skráningu á bréfum félagsins," segir IFS.