Þrotabú Baugs vill rifta 100 milljón króna gjörningi

Héraðsdómur Reykjavíkur þingfesti í dag riftunarmáli þrotabús Baugs gegn Sparisjóði Reykjavíkur og nágrennis (SPRON) þar sem krafist er riftunar á hundrað milljón króna greiðslu til dótturfélags SPRON.

Þrotabú Baugs telur að kröfuhöfum hafi verið mismunað með greiðslunni sem var eitt síðasta verk Baugs áður en félagið fór í þrot á síðasta ári.

Skuldir Baugs við SPRON námu 650 milljónum króna auk þess sem skuld vegna peningamarkaðssjóða bankans námu 2 milljörðum. Við uppgjör á sjóðunum tók bankinn yfir skuldabréfin sem voru gefin út af Baugi og voru í sjóðunum.

Við það var heildarskuld Baugs við SPRON tæpir 3 milljarðar. SPRON gekk nokkuð hart fram í innheimtuaðgerðum og til að forða því að gert yrði fjárnám í Baugi greiddi félagið 100 milljónir inn á reikning dótturfélags í eigu SPRON.

Talið er greiðslan hafi verið óeðlileg þar sem félagið var ekki greiðsluhæft á þessum tíma og að ójafnræði hafi ríkt á milli kröfuhafa. Þrotabúið verður að tryggja að allir kröfuhafar sitji við sama borð.

Ekki þykir líklegt að aðalmeðferð í málinu fari fram fyrr en eftir áramót.