Stefnt að frekari eignasölu hjá Íslandsbanka

Íslandsbanki hefur selt 49% hlut í Skeljungi til Svanhildar Nönnu Vigfúsdóttur, en hún er hluthafi í Skel Investments sem er eigandi 51% hlutar í Skeljungi.

Miðengi, eignarhaldsfélag Íslandsbanka, hélt utanum hlutinn fyrir bankann. Samkvæmt heimildum Vísis.is er frekari tíðinda að vænta frá Miðengi í næstu viku.

Stefna Miðengis er að selja allar eignir sem félagið fær frá bankanum, að því er segir á heimasíðu fyrirtækisins.

Í kjölfar fjármálakreppunnar hafa mörg fyrirtæki fallið í faðm bankanna. Eignarhald þeirra á þessum fyrirtækjum þarf þó ekki að vera tilkomið vegna rekstrarerfiðleika.

Í ljósi sölu Miðengis á hlut sínum í Skeljungi er áhugavert að skoða fyrirtækin sem það á hlut í. Miðengi á hluti í fleiri fyrirtækjum en hér eru nefnd.

Miðengi á Steypustöðina að fullu og heldur um 33% hlut í 66° Norður. Eignarhluturinn er reyndar einungis í rekstrarlegri umsjón hjá Miðengi en hann er í eigu Íslandsbanka. Sigurjón Sighvatsson kvikmyndaframleiðandi er aðaleigandi fyrirtækisins.

Einnig á Miðengi 37% hlut í Capa Invest, sem aftur á 26% hlut í móðurfélagi Capacent. Eignarhluturinn er ekki í söluferli, segir á heimasíðu Miðengis.

Miðengi á 48% hlut í GLB Glacier Renable. Eina eign sjóðsins er 40% eignarhlutur í Geysi Green Energy. Eignarhluturinn í GLB Glacier er ekki í söluferli. Vinna við fjárhagslega endurskipulagningu GGE stendur yfir, segir á heimasíðunni.

Miðengi á 20% hlut í Auðkenni, sem býður upp á lausnir í öryggismálum í rafrænum viðskiptum, ásamt öðrum fjármálafyrirtækjum og Símanum. Og 24% hlut í Median-rafrænni miðlun hf.

Þá á fyrirtækið að fullu fasteignina sem leikskólinn Sjáland í Garðabæ er starfræktur í.

Miðengi á einnig Laugarakur ehf. sem á og rekur íbúðarhúsnæði á Arnarneshæð. Og Rivilus ehf. sem á Lækjargötu 10-12 (útibú Íslandsbanka í Lækjargötu) ásamt Vonarstræti 4b.

Miðengi á 38% hlut í Eignarhaldsfélaginu Fasteign, sem það á ásamt opinberum aðilum, og heldur utanum fasteignir þeirra.

Listi yfir eignir Miðengis.