Telur skynsamlegt að endurvekja Þjóðhagsstofnun

Uppgjörsnefnd Alþingis á bankahruninu vill að stofnuð verði sjálfstæð ríkisstofnun sem hafi það hlutverk að greina efnahagslífið líkt og Þjóðhagsstofnun gerði. Fyrrverandi forstjóri stofnunarinnar telur skynsamlegt að endurvekja hana í einhverri mynd.

Þingmannanefndin hafði það hlutverk að móta tillögur að viðbrögðum Alþingis við niðurstöðum rannsóknarskýrslunnar sem kom út 12. apríl síðastliðinn. Þingmannanefndin tekur undir niðurstöður rannsóknarnefndarinnar og vill að þær verði í meginatriðum lagðar til grundvallar við úrbætur á löggjöf.

Mistök hafi verið gerð í hagstjórn og ríkisfjármálum frá árinu 2003. Þá var ráðist í umfangsmiklar stóriðjuframkvæmdir, útlánareglum Íbúðalánasjóðs var breytt og skattar lækkaðir þvert á ráðleggingar sérfræðinga. Þetta hafi verið gert án þess að brugðist hafi verið á fullnægjandi hátt við hagsveiflum, ofþenslu og vaxandi ójafnvægi í hagkerfinu. Á sama tíma hafi innstreymi erlends fjármagns í landið aukist mjög og stærð bankakerfisins margfaldast árlega.

Þingmannanefndin telur mikilvægt að stjórnmálamenn sýni ábyrgð við hagstjórn og að ekki verði ráðist í umfangsmiklar framkvæmdir, skattalækkanir og fleira, nema að eftir að mat hefur verið gert á afleiðingum þeirra fyrir efnahagslífið.

Vill nefndin að stofnaður verði samráðsvettvangur fjármálaráðuneytis, Alþingis, stofnana, ríkisins, sveitarfélaga og Seðlabankans. Þá vill nefndin að stofnuð verði sjálfstæð ríkisstofnun sem heyrir undir Alþingi og hefur það hlutverk að meta og gefa út spár fyrir efnahagslífið á sama hátt og Þjóðhagsstofnun gerði, þar til hún var lögð niður sumarið 2002.

Þórður Friðjónsson, forstjóri Kauphallarinnar og fyrrverandi forstjóri Þjóðhagsstofnunar, sagði í samtali við fréttastofu í morgun að stofnunin hafi gert gagn og verið gagnrýnin á þróun efnahagsmála. Skynsamlegt sé að skoða það að endurvekja hana í einhverri mynd.