Athyglisvert að sjá hvaða stefnu íbúðamarkaðurinn tekur

„Mjög athyglisvert verður að fylgjast með hvaða stefnu íbúðamarkaðurinn mun taka næstu mánuði og hvort framhald verði á verðhækkunum og aukinni veltu."

Þetta segir í Morgunkorni greiningar Íslandsbanka þar sem fjallað er um fasteignamarkaðinn á höfuðborgarsvæðinu.Samkvæmt upplýsingum Þjóðskrár Íslands voru samtals gerðir 276 kaupsamningar um íbúðarhúsnæði á höfuðborgarsvæðinu í októbermánuði.

Þetta eru heldur færri samningar heldur en gerðir voru í septembermánuði síðastliðnum en þá voru samningarnir fjórðungi fleiri og voru 347 talsins. Reyndar var óvenju mikið um að vera á íbúðamarkaði í september og voru samningar þann mánuðinn fleiri heldur en verið hefur síðan í mars 2008.

Frá hruni hafa verið gerðir að meðaltali 180 kaupsamningar um íbúðarhúsnæði á höfuðborgarsvæðinu í hverjum mánuði. Þrátt fyrir að veltan í október hafi ekki jafnast á við það sem var í metmánuðinum þar á undan er engu að síður um mikla veltu að ræða miðað við hvernig ástandið hefur verið undanfarin misseri. Þetta eru til að mynda 30% fleiri samningar en í sama mánuði fyrir ári síðan þegar samtals 212 kaupsamningum var þinglýst.

Þá er þetta langt yfir þeim fjölda samninga sem voru gerðir á mánuði á fyrri helmingi þessa árs, en þá voru að meðaltali gerðir 200 samningar á mánuði. Heildarvelta þeirra samninga sem gerðir voru í október nam 7,6 mö kr. sem nemur því að meðalupphæð á hvern kaupsamning hafi verið 27,4 m. kr. Allt virðist því benda til þess að lífsmark sé að kvikna á íbúðamarkaði nú á haustdögum.

„Þá hefur íbúðaverð einnig hækkað nú í haust en samkvæmt tölum Hagstofunnar hækkaði íbúðaverð um 1% í október frá fyrri mánuði á landinu öllu og samkvæmt mælingum Þjóðskrár Íslands hækkaði íbúðaverð á höfuðborgarsvæðinu um 0,4% í september frá fyrri mánuði. Mjög athyglisvert verður að fylgjast með hvaða stefnu íbúðamarkaðurinn mun taka næstu mánuði og hvort framhald verði á verðhækkunum og aukinni veltu," segir í Morgunkorninu.