Virði útfluttra sjávarafurða 209 milljarðar árið 2009

Virði útfluttra sjávarafurða árið 2009 var 209 milljarðar króna sem er um 42% af heildarvirði alls útflutnings frá landinu samkvæmt skýrslu Íslandsbanka um sjávarútveg á Íslandi. Þar kemur einnig fram að boðuð fyrningarleið í sjávarútvegi muni hafa þungbær áhrif á greinina.

Hún hefði neikvæð áhrif á verðmæti aflaheimilda og þar af leiðandi á efnahag fyrirtækjanna.

Fyrning hefði jafnframt áhrif á rekstur þeirra þar sem gert er ráð fyrir að fyrirtækin leigi aflaheimildir aftur gegn gjaldi. Ljóst er að lán til sjávarútvegs vega þungt í efnahagsreikningum hinna endurreistu banka.

Skuldir sjávarútvegsfyrirtækja eru gríðarlegar en þær voru 465 milljarðar króna í lok árs 2008.

Aftur á móti hafa handhafar um 64 prósent aflaheimilda forsendur til að standast skuldbindingar sínar samkvæmt greiningu á stöðu 50 stærstu fyrirtækja í greininni samkvæmt skýrslu Íslandsbanka.