Arnar: Viðskiptin skipta miklu máli fyrir lífeyrissjóðina

"Þetta skiptir gríðarlegu máli og er stór dagur. Þetta styrkir stöðu sjóðanna og ef við horfum til framtíðar þá bætir þetta tryggingafræðilega stöðu sjóðanna um 1-2% og það eru miklir fjármunir," segir Arnar.

En gæti þetta þýtt minni skerðingar hjá lífeyrissjóðum? "Þetta gæti fyrst og fremst virkað gagnvart næsta ári, því viðskiptin koma fram í tryggingafræðilegum uppgjörum lífeyrissjóðanna um næstu áramót. Það gæti því hjálpað í þeim efnum," segir Arnar.

Arnar segir að um hafi verið að ræða tilboð sem ekki var hægt að hafna. "Við höfum fylgst með þessu máli mjög náið á annað ár og vitað af þessum bréfum. En þetta kom mjög snöggt upp, boltinn byrjaði ekki að rúlla fyrr en síðustu daga, þannig að margir okkar voru með hugann við þetta alla helgina. Samkomulagið náðist svo í gærkvöldi," segir Arnar Sigurmundsson.

Bréfin sem lífeyrissjóðirnir kaupa af Seðlabankanum eru verðtryggð, að jafnaði til níu ára og ávöxtunarkrafan er 7,2%. Ávöxtunarkrafan er umtalsvert hærri en miðað er við í tryggingafræðilegu uppgjöri lífeyrissjóðanna og því má ætla að viðskiptin bæti tryggingafræðilega stöðu lífeyrissjóðakerfisins um 1-2%.