Gylfi: Ágæt lausn sem kemur sér vel fyrir alla

Gylfi Magnússon efnahags- og viðskiptaráðherra segir að samkomulag Seðlabankans og lífeyrissjóðanna í morgun sé ágæt lausn sem komi sér vel fyrir alla sem að málinu koma. Eins og kunnugt er af fréttum keyptu lífeyrissjóðirnir íbúðabréf þau sem Seðlabankinn hafði keypt af seðlabankanum í Lúxemborg fyrr í þessum mánuði.

„Það er ástæða til að fagna þessari niðurstöðu í málinu," segir Gylfi Magnússon. „Það sem gerist er að staða ríkissjóðs batnar, gjaldeyrisforðinn eykst og tryggingarfræðileg staða lífeyriskerfisins batnar."

Gylfi segir að það hafi ekki verið síður tilefni til að fagna því að Seðlabankanum tókst fyrr í mánuðinum að ná samkomulagi við seðlabankann í Lúxemborg um þessi bréf. Það hefði létt mjög á erfiðri stöðu sem komin var upp.

„Það er óhætt að segja að Seðlabankinn hefur staðið sig vel í þessum málum," segir Gylfi.