Bankar fresta innheimtu á 3 milljarða fjárkröfu

Bankar sem eiga þriggja milljarða króna fjárkröfur á hendur eitthundrað og fjörutíu Húnvetningum og Strandamönnum vegna stofnfjárkaupa í sparisjóði héraðsins, hafa frestað því þar til síðar á árinu að hefja innheimtu.

Áætla má að um fimmtungur heimila og bújarða á svæðinu geti lent á nauðungaruppboði vegna málsins en hjá mörgum nema skuldir vegna misheppnaðra stofnfjárkaupa tugum milljóna króna.

Áður höfðu Landsbankinn og Sparisjóður Keflavíkur veitt skuldurunum frest til maímánaðar til að gera upp en hafa nú framlengt hann, ýmist til hausts eða fram undir áramót.