Deutsche Bank gæti létt á erlendum skuldum Íslands um 10%

Leiða má góðar líkur að því að Deutsche Bank sé að létta á erlendri skuldastöðu íslenska þjóðarbúsins um 10% eða 300 milljarða kr.

Eins og fram hefur komið í fréttum Stöðvar 2 og á visir.is hefur Deutsche Bank sótt um leyfi til framkvæmdanefndar Evrópusambandsins til að yfirtaka Actavis. Fari svo að Deutsche Bank fái þetta leyfi, sem allt bendir til, gæti það létt töluvert á erlendri skuldastöðu íslenska þjóðarbúsins.

Erlendar skuldir þjóðarbúsins nema nú rétt rúmum 3.000 milljörðum króna ef frá eru taldir bankarnir sem eru í slitameðferð.

Fram kom í fréttum í fyrra að skuldir Actavis næmu 1.000 milljörðum króna af erlendum skuldum þjóðarbúsins. Sú tala er komin niður í rúma 800 milljarða króna ef tekið er mið af gengisþróuninni.

Ekki fæst uppgefið hjá Seðlabankanum hversu hátt Actavis er metið í erlendum eignum þjóðarbúsins en samkvæmt fréttum á Reuters í vetur var Actavis metið á ca. 3,5 milljarða evra eða rúmlega 500 milljarða króna. Með yfirtöku Deutsche Bank myndi erlenda skuldastaðan því batna um 300 milljarða króna eða 10% af heildinni.

Erlendar eignir þjóðarbúsins nema tæpum 2.500 milljörðum kr. og þær myndu lækka niður í tæpa 2.000 milljarða kr. við yfirtöku Deutsche Bank á Actavis. Munurinn sem er á erlendum eignum og skuldum þjóðarbúsins myndi því minnka töluvert við yfirtökuna.

Annað er að við yfirtökuna myndu erlendar skuldir þjóðarbúsins sem hlutfall af landsframleiðslu fara töluvert undir 200% en oft hefur verið talað um að erlendar skuldir umfram það mark séu ósjálfbærar. Raunar færu erlendu skuldirnar niður í um 150% af landsframleiðslu miðað við fyrrgreindar forsendur.