CCP kynnir Eve Gate á IBM ráðstefnu Nýherja

CCP hefur tekið í notkun vefgáttina Eve Gate sem tengir notendur sýndarveruleikaheimsins Eve Online enn frekar. Greint verður frá Eve Gate, þróun Eve Online og samspili hugbúnaðar og vélbúnaðar á IBM Comes to You ráðstefnu Nýherja, sem fram fer á Hótel Örk á morgun, þann 7. október.

Í tilkynningu segir að Beta útgáfa af Eve Gate var tekin í notkun á árinu og er gert ráð fyrir að fullbúin útgáfa líti dagsins ljós fyrir lok árs. Eve Gate er nokkurs konar samfélagsmiðill sem gerir notendum Eve Online kleift að eiga vefsamskipti við hvorn annan utan leiksins.

Í Eve Gate er einnig að finna ýmis konar þjónustu fyrir notendur, svo sem tölvupóst, tengiliðaskrá, viðburðadagatal fyrir hópa og upplýsingar um uppfærslur.

Á ráðstefnunni mun Andrés Sighvatsson kerfisstjóri hjá CCP fjalla um eiginleika IBM System x vélbúnaðar fyrir Eve Online og framtíðarþróun leiksins með hliðsjón af vélbúnaði. Einnig verður greint frá IBM Schooner hugbúnaði sem keyrir Eve Gate samskiptavefinn.

Alls spila 330.000 áskrifendur EVE Online á sama klasa og hafa samtíma notendur mest verið 60.000 talsins. Leikurinn keyrir á System x netþjónum frá IBM.