Frumtak styður við sprotafyrirtækin

Samlagssjóðurinn Frumtak er í eigu Nýsköpunarsjóðs atvinnulífsins, viðskiptabankanna þriggja og nokkurra lífeyrissjóða. Hann hefur yfir að ráða um fjórum milljörðum króna til kaupa á hlutafé í sprota- og nýsköpunarfyrirtækjum sem komin eru af klakstigi og eru vænleg til vaxtar og útrásar. Segja má að hann sé beint framhald af Nýsköpunarsjóði, sem fjárfestir í fyrirtækjum á klakstigi.

Frumtak var sett á laggirnar vorið 2008 en fjárfesti í fyrsta sinn í febrúar í fyrra. Sjóðurinn hefur síðan þá keypt hlutafé í sex fyrirtækjum til viðbótar, þremur til fjórum á ári fyrir 832 milljónir króna.

Hver einstök fjárfesting Frumtaks getur hlaupið á allt frá fimmtíu til fimm

hundruð milljónum króna. Í reglum sjóðsins er miðað við að hann eigi hlutinn í þrjú til fimm ár. Ávöxtunarkrafa einstakra fjárfestinga er þrjátíu prósent að lágmarki. Sjálfur á sjóðurinn að vera starfræktur í sjö ár. Hann hefur heimild til að uppbótartíma í þrjú ár.

Frumtak er starfræktur sem hefðbundinn sjóður. Hann er lokaður, kallar eftir nýju fé frá fjárfestum sem hlutdeild eiga í honum og fjárfestir í fjögur ár. Fjárfestingartímabilið er því rétt hálfnað.

Eggert Claessen, framkvæmdastjóri Frumtaks, reiknar með því að verði fjárfest á sama hraða og hingað til muni sjóðurinn eiga í fimmtán fyrirtækjum þegar yfir lýkur. Hann segir sjóðinn nýta helming fjárfestingargetu sinnar.

„Ég hafði meiri væntingar til hans. Staðreyndin er sú að þau verkefni sem sjóðnum stendur til boða að fjárfesta í eru ekki það mörg eða af þeim gæðum sem sjóðurinn gerir kröfu um. Það er áhyggjuefni,“ segir hann. „Ég hélt í upphafi – fyrir tveimur árum – að ég myndi nær drukkna í endalausum hugmyndum. Staðreyndin er sú að svo er ekki. Við virðumst eiga nóg af hugmyndum en ekki nóg af fyrirtækjum.“