Bandaríkin og Ísland skrifa undir samning um jarðhitatækni

Ísland og Bandaríkin skrifuðu í dag undir samning sem miðar að aukinni þekkingu á jarðhitatækni um heim allan og frekari nýtingu hennar.

Sendiherra Bandaríkjanna á Íslandi, Luis E. Arrega, og Katrín Júlíusdóttir iðnaðarráðherra skrifuðu undir samninginn í Þjóðmenningarhúsinu.

Orkumálaráðuneyti Bandaríkjanna (U.S. Department of Energy) og iðnaðarráðuneytið skrifuðu undir tvíhliðasamning um vísinda- og tæknisamstarf á sviði jarðhitarannsókna og -þróunar.

Hann skapar grundvöll fyrir vísindamannaskipti, sameiginleg verkefni, og nýsköpun á sviði menntunar, með það í huga að flýta tækniþróun.

Auk þess er markmið hans að greina þær hindranir sem standa í vegi fyrir aukinni nýtingu jarðhita.

Undirskriftin var þáttur af jarðhitavikunni 3.-9. október, en fulltrúar ýmissa landa hafa verið hér á landi þá viku með það að markmiði að stuðla að þróun jarðhitatækni og hagvæmari nýtingu hennar, auk þess sem þeir hafa rætt önnur mál sem tengjast nýtingu jarðhita.