Auglýsingar til almannaheilla

Auglýsingar njóta ekki sannmælis í umræðunni á Íslandi, að því er kemur fram í nýútkomnu tölublaði Fítonblaðsins, sem er gefið út árlega af auglýsinga- og markaðsstofunni Fíton.

Meginþráðurinn í blaðinu er að þrátt fyrir neikvæða umræðu komi auglýsingar öllum til góða. Í leiðara blaðsins segir að auglýsingar geti auðveldað fólki að finna sér vörur og þjónustu, stuðli að virkri samkeppni lægra vöruverði, styðji góð málefni og skapi tekjur fyrir þjóðarbúið. Þormóður Jónsson hjá Fíton segir blaðið taka á þessari neikvæðu umræðu sem og forræðishyggju.

„Við teljum að auglýsingar séu hornsteinn í allri samkeppni sem heldur niðri vöruverði. Þá vinnum við í auglýsingabransanum líka að almannaheill, þar sem við í Fíton gáfum til dæmis okkar vinnu í átakinu Á allra vörum sem safnaði 40 milljónum á dögunum.“

Þormóður bætir því við að forræðishyggja, til dæmis varðandi auglýsingar á áfengi, skaði innlendan iðnað sem keppi við erlenda vöru sem birtist í erlendum miðlum. Þá styðji auglýsingar samkeppni og lýðræði í gegnum upplýsingamiðlun, meðal annars með því að frambjóðendur geti kynnt sig og sín baráttumál fyrir væntanlegum kjósendum.

Auglýsingar séu, þegar allt kemur til alls, jákvæðar fyrir samfélagið í heild sinni. „Það þarf að hugsa út fyrir boxið þegar verið er að ræða neikvætt um auglýsingar vegna þess að í auglýsingalausum heimi erum við ráðvillt.“ - þj