Kalli í Pelsinum og sonur yfirheyrðir

Efnahagsbrotadeild Ríkislögreglustjóra gerði húsleit á þremur stöðum í dag vegna sölu á stórhýsi til kínverska sendiráðsins. Seljendur hússins eru grunaðir um fjársvik og hefur þegar verið lagt hald á níutíu og þrjár milljónir króna af meintum ávinningi.

Málið snýst um þetta hús hér. Það var í eigu feðganna Arons og Karls Steingrímssonar sem gjarnan er kenndur við Pelsinn. Á því hvíldu fjögur tryggingarbréf í eigu Arion Banka, Glitnis og Íslandsbanka. Hvert bréf stóð í 246 milljónum króna haustið 2008 en þau eru verðtryggð og hafa því hækkað nokkuð síðan þá.

Upphaflega var húsið, sem er við Skúlagötu 51, í eigu Vindasúlna ehf, sem er í eigu þeirra feðga. 2. desember var gert tilboð í húsið. Húsið var aftur á móti flutt út úr Vindasúlum þann 11. Desember og inn í eignarhaldsfélagið 2007. Þremur dögum síðar gerði sami aðili annað tilboð í húsið upp á 575 milljónir króna. Þann 16. desember féllust bankarnir á tilboðið en degi síðar seldu eigendurnir húsið til kínverska sendiráðsins fyrir 870 milljónir króna.

Bankarnir telja að með þessum gjörningi hafi feðgarnir haft af þeim allt að 300 milljónir króna og fóru fram á lögreglurannsókn. Í dag framkvæmdi efnahagsbrotadeild Ríkislögreglustjóra húsleitir á þremur stöðum; starfsstöð feðganna og tveimur öðrum mönnum sem sáu um viðskiptin.

Þá hefur verið lagt hald á meintan ávinning upp á 93 milljónir króna.

Yfirheyrslur hafa farið fram í dag og standa enn yfir. Rannsakað er hvort feðgarnir hafi beitt blekkingum til að bankarnir afléttu skuldum á húsinu miðað við lægra kauptilboðið. Í samtali við fréttastofu sagði Aron að það væri af og frá að þeir feðgar hefðu hagnast um 300 milljónir á viðskiptunum og að engar afskriftir hefðu átt sér stað.