Telur of snemmt að blása kreppuna af

Nýjar tölur um landsframleiðslu á öðrum ársfjórðungi þessa árs eru mikið áhyggjuefni, að mati Bjarna Más Gylfasonar hagfræðings Samtaka iðnaðarins. Þær gefa til kynna að hagkerfið sé enn í samdrætti og framleiðsla að minnka. Hann segir of snemmt að blása kreppuna af.

„Fyrir utan samneysluna eru allir undirliðir landsframleiðslunnar að dragast saman og raunar er núna að mælast mesti samdráttur í einkaneyslu og landsframleiðslu milli ársfjórðunga síðan áfallið reið yfir seinni hluta árs 2008 eða ríflega 3%," segir Bjarní Már á vef Samtaka iðnaðarins. „Þetta er þvert á þau skilaboð sem stjórnmálamenn eru að senda okkur um að botninum sé náð og að betri tíð sé framundan. Vissulega væri óskandi að svo væri en hagtölur benda því miður til annars."

Aðrir þættir horfa til betri vegar. Störfum fjölgaði í upphafi árs, atvinnuleysi hefur verið að minnka, verðbólga að lækka og gengið að styrkjast. Bjarni Már bendir hins vegar á að minnkandi verðbólga og lækkandi vextir sé samt skýrt merki um samdráttinn í hagkerfinu.

Skammgóður vermir

„Kannski erum við nú að súpa seyðið af skattahækkunum síðasta árs og þeim töfum sem orðið hafa á fyrirhuguðum stórframkvæmdum. Einkaneyslan í fyrra var líka óvenju há vegna mikils útstreymis fjármagns úr séreignalífeyrisjóðum og ríkissjóður fékk þar óvæntar skatttekjur," segir Bjarni Már og bætir við að það sé skammgóður vermir að halda áfram á þeirri braut.

„Einnig er rétt að benda á að samdrátturinn í fyrra varð minni en ella vegna veikrar stöðu krónunnar og tilsvarandi aukningar í útflutningstekjum. Án fjárfestingar og uppbyggingar er ekki hægt að auka útflutning mikið meira."