Afskrifa á tæpa 14 milljarða af lánum landbúnaðarins

Til stendur að afskrifa 13,8 milljarða vegna Lánasjóðs landbúnaðarins samkvæmt framhaldsnefndaráliti um fjáraukalög fyrir árið 2010. Sjóðurinn var vistaður hjá Landsbankanum en alls er ætlunin að afskrifa ýmsar skuldbindingar ríkisins hjá Landsbankanum um rúma 22 milljarða kr.

Í þingskjali um málið undir liðnum fjármálaráðuneytið segir; „Lagt er til að í frumvarpinu verði gert ráð fyrir 23,7 milljarða kr. fjárheimild vegna gjaldfærslu á ríkisábyrgðum á lánum sem ríkissjóður mun taka yfir vegna föllnu bankanna. Er það til viðbótar við liðlega 1 milljarðs kr. hækkun í þessum útgjöldum sem þegar hefur verið gert ráð fyrir í frumvarpinu með tillögu við 2. umræðu. Ríkissjóður mun eftir sem áður gera kröfur í þrotabú bankanna um endurheimtur. Þar af eru 22,5 milljarðar kr. vegna gjaldfærslu á uppreiknuðum höfuðstól þessara ábyrgða sem gert er ráð fyrir að gera þurfi í ríkisreikning ársins 2010."

Síðan segir að þegar ríkisviðskiptabankarnir voru gerðir að hlutafélögum á sínum tíma hvíldu á þeim ýmsar skuldbindingar vegna skuldabréfa með ríkisábyrgð sem þá höfðu verið útgefin. Ríkið ber því enn ábyrgð á þeim skuldbindingum.

„Hér er um að ræða Útvegsbanka Íslands sem Íslandsbanki yfirtók gegnum Fjárfestingarbanka atvinnulífsins og svo Landsbanka Íslands sem yfirtók skuldbindingar Lánasjóðs landbúnaðarins á sínum tíma. Nær öll lánin eru hjá Landsbankanum, 22,1 milljarður kr., og þar af er stærsti hlutinn vegna Lánasjóðs landbúnaðarins, 13,8 milljarðar kr.," segir í skjalinu.

Björn Valur Gíslason þingmaður Vinstri grænna í fjárlaganefnd segir að í hinu „mikla óðagoti" sem fylgdi einkavæðingu Landsbankans á sínum tíma tók Björgólfur Guðmundsson og félagar Lánasjóð landbúnaðarins með í kaupunum en hinsvegar hafi „gleymst" að aflétta ríkisábyrgðinni á þeim tíma. Skuldbindingin lenti því á ríkissjóði þegar Landsbankinn féll haustið 2008.