Hagnaður Iceland Express 586 milljónir í fyrra

Hagnaður Iceland Express á árinu 2009 nam 586,6 milljónum króna eftir skatta. Árið áður var tap af rekstri félagsins upp á um einn milljar kr. Þar réði hátt olíuverð mestu. Hér er því um algjöran viðsnúning að ræða hjá félaginu, en þess ber þó að geta að góður hagnaður var á árinu 2007.

Í tilkynningu segir Bókfært eigið fé í árslok 2009 var jákvætt um 414 milljónir kr. Eignir Iceland Express eru metnar á tæpa tvo milljarða kr. og er að mestu um að ræða veltukröfur, meðal annars á ferðaskrifstofur, sem þegar hafa verið greiddar.

Rekstrarhorfur ársins 2010 eru góðar. Ljóst er, að eldgosið í Eyjafjallajökli hafði í för með sér talsverðan kostnað og minni sölu en spár gerðu ráð fyrir. Úr því rættist þó er líða fór á árið einkum vegna þess, hversu flugleiðin til Bandaríkjanna gekk vel. Því er rekstur 2010 í samræmi við áætlanir.

Rekstrarhorfur 2011 eru mjög góðar, sala gengur vel og eru allar líkur á því, að farþegum félagsins fjölgi mikið. Þá hefur starfsmönnum fjölgað og útlit er fyrir frekari fjölgun.