Milljarða tekjuauki Landsvirkjunar vegna nýs samnings

Tenging raforkuverðs frá Landsvirkjun við álverð á heimsmarkaði rofnar um næstu mánaðamót þegar endurskoðaður samningur um orkusölu til álversins í Straumsvík tekur gildi.

Í stað álverðsins er verðið nú miðað við verðbólgu í Bandaríkjunum og þróun raforkuverðs til álvera í heiminum.

Samkvæmt heimildum Fréttablaðsins innan úr Landsvirkjun aukast tekjur fyrirtækisins um milljarða króna á ársgrundvelli miðað við núverandi álverð.

Í nýja samningnum eru ákvæði um að Landsvirkjun afhendi 658 gígavattstundir af orku til viðbótar vegna áætlaðrar framleiðsluaukningar í Straumsvík. Sú orka á að koma úr Búðarhálsvirkjun en sem kunnugt er hefur ekki tekist að ljúka fjármögnun virkjunarinnar. Hörður Arnarson, forstjóri Landsvirkjunar, segir í samtali við Fréttablaðið að nýi samningurinn bæti stöðu fyrirtækisins gagnvart matsfyrirtækjum og lánsfjármarkaði. Hann segist bjartsýnn á að fjármögnun ljúki á næstu vikum.

Hörður segir mikilvægt að samningurinn feli nú í sér minni áhættu fyrir Landsvirkjun og hagstæðara orkuverð. Nú muni það verð sem álverið í Straumsvík greiðir þróast í takt við þróun raforkuverðs á alþjóðamörkuðum. Þótt erfitt sé að bera samningana saman út frá ákveðinni prósentubreytingu á orkuverði þurfi álverð á alþjóðlegum markaði að verða býsna hátt til þess að eldri aðferðin skili Landsvirkjun hagstæðari niðurstöðu en endurskoðaði samningurinn.

Álverðið er nú um 2.100 dollarar tonnið en hefur á síðustu misserum sveiflast úr 1.300 dollurum og yfir 3.000 dollara.

Spár flestra greiningaraðila benda, að sögn Harðar, til þess að nýi samningurinn muni skila Landsvirkjun mun hagstæðari niðurstöðu en áður: „Menn telja að raforka muni áfram hækka umfram verðbólgu en að álverð muni hins vegar ekki halda í við verðbólgu," segir hann. -pg / sjá síðu 10