Fjárfestar áhugasamir um ríkisvíxla - stabbinn minnkar

Fjárfestar reyndust áhugasamir um ríkisvíxlaútboðið sem haldið var hjá Lánamálum ríkisins síðastliðinn föstudag. Þannig bárust alls 50 gild tilboð í ríkisvíxlaflokkinn RIKV 10 1015 að fjárhæð tæplega 31,3 milljarða kr. að nafnverði. Á morgun mun ríkisvíxlastabbinn minnka um 4,3 milljarða kr.

Fjallað er um málið í Morgunkorni greiningar Íslandsbanka. Þar segir að ákveðið var að taka nærri tveimur þriðju hlutum tilboðanna sem nemur að fjárhæð 20 milljörðum kr. á 5,95% flötum vöxtum. Ríkissjóður má vel una miðað við þessa niðurstöðu, en vaxtakjör ríkissjóðs í útboðinu nú eru þau bestu frá því í maí í fyrra þegar vegnir meðalvextir voru 5,74%.

Áhugavert er að bera meðalvexti í víxlaútboðum Lánamála saman við aðra skammtímaávöxtun á markaði. Til að mynda eru 3ja mánaða vextir á millibankamarkaði nú 7,2%, eða ríflega 1,2 prósentum hærri en vextirnir í víxlaútboðinu fyrir helgi. Millibankavextirnir hafa raunar oftar en ekki verið hærri en vextir í víxlaútboðum Lánamála undanfarna 18 mánuði.

Á haustdögum í fyrra og á fyrstu mánuðum þessa árs voru þó vextir í víxlaútboðum og 3ja mán. millibankavextir nánast þeir sömu. Líklegt er að a.m.k. hluti útlendinganna sem mynda eigendahóp víxlanna telji sig hafa í fá önnur hús að venda til að ávaxta krónur sínar og kann það að vera skýring á stórum hluta þess munar sem lengst af hefur verið á vaxtakjörum víxla og innlána undanfarið.

Hér þarf raunar einnig að hafa í huga, þegar verið er að bera saman 3ja mánaða millibankavexti og vexti á 4ja mánaða víxlum að í vaxtalækkunarferli, eins og nú stendur yfir, verður vaxtaróf á millibankamarkaði gjarnan niðurhallandi og því eðlilegt að vextir víxlanna séu að öðru jöfnu lítið eitt lægri.

Á gjalddaga á morgun eru 24,3 miljarðar kr. af ríkisvíxlum og minnkar því heildarstabbi útistandandi ríkisvíxla úr rúmum 76,6 milljörðum kr. í rúma 72,3 milljarða kr. Ekki liggja fyrir upplýsingar þessa stundina um af hvaða tagi kaupendur ríkisvíxlanna voru síðastliðinn föstudag.

„Teljum við þó afar líklegt eins og svo oft áður að erlendir aðilar hafi verið þar fyrirferðamiklir en þeir höfðu upphaflega keypt 65% af seldum bréfum í þeim víxlaflokki sem er á gjalddaga á morgun," segir í Morgunkorninu. „Samkvæmt Markaðsupplýsingum sem Lánamál sendu nýverið frá sér nam eignarhlutdeild erlendra aðila í ríkisvíxlum í lok apríl ríflega 69%. Í víxlaútboðinu í maí höfðu þeir keypt víxla fyrir 5,8 milljarða kr. að nafnverði, en alls voru þá seldir víxlar fyrir rúma 12,3 milljarða kr. Má því ætla að eignarhlutdeild þeirra af útstandandi ríkisvíxlum í lok maí hafi lækkað lítillega og farið niður í tæp 68%."