Atvinnuleysið var 9% í apríl

Skráð atvinnuleysi í apríl 2010 var 9% en að meðaltali 14.669 manns voru atvinnulausir og minnkar atvinnuleysi um 2,6% frá mars, eða um 390 manns að meðaltali.

Þetta kemur fram á vefsíðu Vinnumálastofnunnar. Þar segir að alls voru 15.932 atvinnulausir í lok apríl. Þeir sem voru atvinnulausir að fullu voru hins vegar 13.082, af þeim voru 3.701 í einhvers konar úrræðum á vegum Vinnumálastofnunar, auk þess sem mikill fjöldi fer í ráðgjafarviðtöl, á kynningarfundi og í vinnumiðlun.

Fækkun atvinnulausra í lok apríl mánaðar frá lokum mars nam 550, en 502 færri karlar voru á skrá og 48 færri konur. Á landsbyggðinni fækkar um 274 og um 276 á höfuðborgarsvæðinu.

Fjöldi þeirra sem hafa verið atvinnulausir lengur en 6 mánuði er nú 8.917 og fjölgar um 384 frá lokum mars og er um 56% þeirra sem eru á atvinnuleysisskrá í lok apríl. Þeim sem verið hafa atvinnulausir í meira en eitt ár fjölgar úr 4.601 í lok mars í 4.662 í lok apríl.

Alls voru 3.024 á aldrinum 16-24 ára atvinnulausir í lok apríl en 3.147 í lok mars eða um 19% allra atvinnulausra í apríl.

Yfirleitt batnar atvinnuástandið frá apríl til maí. Í maí 2009 minnkaði atvinnuleysi úr 9,1% í apríl í 8,7% í maí. Vinnumálastofnun áætlar að atvinnuleysið í maí minnki og verði á bilinu 8,6%-9,0%.