Skoða lögmæti fjármögnunar ríkisbankanna

Verið er að kanna hvort endurfjármögnun bankanna síðasta sumar stangist á við reglur Evrópska Efnahagssvæðisins (EES) og flokkist sem ólöglegur ríkisstuðningur. ESA (Eftirlitstofnun EFTA) er nú með málið til skoðunar.

Per Sanderud, forseti ESA, hefur fundað með ráðherrum undan­farna daga hér á landi. Þar hefur þetta mál borið á góma og Sanderud tekur fram að það sé allsendis óvíst hvort svo sé háttað. Svo geti farið að stuðningurinn falli undir reglur EES.

„Endurfjármögnun bankanna gæti fallið undir reglur um stuðning ríkisins, en það hefur ekki verið ákvarðað enn. Ef svo er hefði átt að sækja um leyfi til okkar og við að úrskurða hvort þetta væri löglegt. En það er ekki enn komið að því. Stjórnvöld hafa tekið saman útskýringar á því hvernig þessu var háttað og hvaða skilyrðum endurfjármögnunin var háð. Þetta er mikið af upplýsingum sem við förum núna yfir."

Verði endurfjármögnunin metin sem ríkisstuðningur þarf að meta hvort hún sé engu að síður eftir þeim reglum sem hann fellur undir. Sé hún metin ólögleg fer fram rannsókn á ferlinu sem getur endað á því að gjörðin gengur til baka og leysa þarf málefni bankanna upp á nýtt, eftir settum reglum.

Sanderud segir óljóst hvenær málin skýrist. Það velti á gæðum þeirra gagna sem stjórnvöld hafa tekið saman um málið. Mjög mikilvægt sé að ESA fái þær upplýsingar sem á þarf að halda. Það versta sem komið geti úr þessu sé að endurheimta þurfi féð.

Sanderud hefur hitt nokkra ráðherra sem véla um þau málefni sem tengjast EES. Þá hefur starfsfólk ESA fundað með starfsfólki fjölda ráðuneyta.

Málefni Icesave hafa einnig borið á góma í viðræðunum, en ESA sendi íslenskum stjórnvöldum nýverið bréf þar sem það álit stofnunarinnar kom fram að Íslendingar yrðu að standa undir lágmarkstryggingu, 20.887 evrum, á Icesave-reikningunum. Að öðrum kosti færi málið fyrir dómstól EFTA.

Sanderud segir málið aðeins lauslega hafa verið rætt, álit ESA sé skýrt og nú sé svars íslenskra stjórnvalda beðið. Þau hafa tvo mánuði til viðbragða.

„Ef þeir þurfa lengri frest tökum við það til athugunar, en nú erum við að bíða viðbragða íslenskra stjórnvalda við þessu bráðabirgðaáliti okkar."kolbeinn@frettabladid.is