Engin áætlun til um afnám hafta

Stjórnvöld hafa sem stendur enga áætlun um afnám gjaldeyrishaftanna, en Seðlabankinn tilkynnti að hann hefði horfið frá fyrri áætlun í ræðu sem flutt var yfir lokuðum hópi hinn 7. október síðastliðinn. Forsætisráðherra segir að unnið sé að því að afnema höftin sem fyrst.

Arnór Sighvatsson, aðstoðarseðlabankastjóri, upplýsti á fundi með Íslenskum verðbréfum hinn 7. október síðastliðinn að Seðlabankinn hefði horfið frá fyrri tímaáætlun um afnám haftanna í þrepum. Á þessum tímapunkti hafði markaðsaðilum ekki verið tilkynnt um áform Seðlabankans, en ræða Arnórs var birt á vef Seðlabankans.

Sem stendur hafa því stjórnvöld enga áætlun um afnám haftanna, eftir því sem fréttastofa kemst næst, en Seðlabankinn hefur samt verið að hleypa einstökum aðilum og verkefnum framhjá höftunum að undanförnu. Við greindum fyrst frá því í fréttum okkar á föstudag að Samtök Iðnaðarins hefðu gert samkomulag við Seðlabankann um tilraunaverkefni um að hleypa aflandskrónum sem sitja fastar í Lúxemborg í fjárfestingu á Íslandi, en það hefur verið óheimilt til þessa að flytja íslenskar krónur af erlendum bankareikningum hingað heim vegna haftanna.

Svo í dag tilkynnti Össur hf. að Seðlabankinn hefði veitt eigendum hlutabréfa í fyrirtækinu heimild til að flytja þau úr íslensku kauphöllinni og í Kauphöllina í Kaupmannahöfn og fá þau skráð samhliða í dönskum krónum en markaðsaðilar furðuðu sig á því í dag að heimildin ætti við um Össur eitt fyrirtækja.

Jóhanna Sigurðardóttir, forsætisráðherra, segir að verið sé að skoða hvaða leiðir eru færar til að koma okkur sem fyrst út úr gjaldeyrishöftunum. „Við erum búin að byggja upp mjög öflugan gjaldeyrisforða sem er að hjálpa okkur að komast út úr þessari kreppu ekki síst núna þegar við erum að skoða það með hvaða hætti og hvernig við getum, á sem stystum tíma, komist út úr gjaldeyrishöftunum," segir Jóhanna.