Samlagsfélögum heldur áfram að fjölga

Á meðan nýjum einkahlutafélögum heldur áfram að fækka í ár miðað við árið í fyrra heldur samlagsfélögum áfram að fjölga.

Greining Íslandsbanka fjallar um málið í Morgunkorni sínum þar sem skoðaðar eru tölur frá Hagstofunni í morgun um fjölda gjaldþrota og nýskráningar félaga í september.

Í Morgunkorninu segir að öðru gegnir um þróun samlagsfélaga en þróun einkahlutafélaga, en þeim hefur fjölgað verulega á árinu miðað við síðustu ár. Þannig voru alls 22 skráð samlagsfélög í september en á sama tíma fyrir ári voru þau aðeins 4 talsins.

Hafa nú frá áramótum talið verið stofnuð alls 358 samlagsfélög samanborið við 59 slík félög á sama tímabili í fyrra. Ástæða þess að samlagsfélögum fjölgar svo mikið nú er líklega viðbrögð við breyttu skattaumhverfi, en skattlagning samlagsfélaga er hagstæðari en gerist í einkahlutafélögum.

Samlagsfélag er blanda af sameignarfélagi og hlutafélagi þar sem að minnsta kosti einn aðili ber ótakmarkaða ábyrgð á skuldbindingum félags.