Atvinnuleysi minnkar um mitt næsta ár

Atvinnuleysi hér á landi mun ekki taka að lækka að marki fyrr en um mitt næsta ár, segir í fjárlagafrumvarpi sem kynnt var fyrir fjölmiðlamönnum á föstudaginn.

Fjármálaráðuneytið segir að atvinnuleysi hafi vaxið hraðar og meira á Íslandi en í nágrannalöndunum. Engu að síður er atvinnuleysið hér minna en í flestum ríkjum í kringum okkur. Það var í kringum 8,7% á öðrum árshluta samkvæmt vinnumarkaðskönnun Hagstofunnar og í OECD löndunum er það einnig á bilinu 8-9%.

Munurinn á Íslandi og öðrum OECD ríkjum er hins vegar sá að hér á landi var atvinnuleysi nær óþekkt um árabil fyrir bankahrunið en atvinnuleysið í OECD ríkjum var á bilinu 5,5-6%.