Kröfuhafar Þorgils tapa 600 milljónum

Aðeins 1,8 milljónir kr. fengust upp í kröfur í þrotabú C22 sem var í eigu Þorgils Óttars Mathiesen fyrrum forstjóra Sjóvár. Þar með töpuðu kröfuhafar nær 600 milljónum kr. á þrotabúinu en stærsti kröfuhafinn var Íslandsbanki.

Fréttir af skuldamálum Þorgils Óttars vöktu mikla athygli fyrr á árinu. Félagið C22 fékk 600 milljón króna kúlulán sem Þorgils notaði í því sem kalla mætti flókinni eignafléttu.

Þegar mest var árið 2008 námu skuldir C22 um sautján hundruð milljónum króna; helstu eignir félagsins var hlutur í Glitni og eftir krókaleiðum, fasteignafélaginu Klasa.

Þannig var ein stærsta eign C22 dótturfyrirtækið verslun Einars Þorgilssonar en verslun Einars Þorgilssonar átti þriðjungs hlut í fyrirtækinu Sigla. Sigla var svo eini eigandi fasteignafélagsins Klasa, sem á meðal annars hlut í Háskólavöllum á Reykjanesi, skrifstofum Morgunblaðsins í Hádegismóum og leiguíbúðum á Keflavíkurflugvelli.

C22 seldi svo allt hlutabréf sitt í verslun Einars Þorgilssonar árið 2008, en hana á Þorgils að mestu sjálfur. Auk þess færði hann eignarhlut sinn úr Siglu yfir í verslun Einars Þorgilssonar og skildi því þannig milli eigna sinna og skulda.

Aðeins 1,8 milljón fékkst upp í skuld eignarhaldsfélagsins C22 við Íslandsbanka þegar félagið var úrskurðað gjaldþrota á dögunum. Í úrskurði Héraðsdóms Reykjaness kemur fram að 0,3 prósent eða um 1,8 milljón voru greiddar upp í almennar kröfum. Eftir stóðu lýstar kröfur að upphæð 598 milljónir í eignarhaldsfélaginu C22 sem ekkert fæst upp í.