Aðstæður kalla á lækkun stýrivaxta

Efnahagsaðstæður kalla á 0,75 prósentustiga lækkun stýrivaxta, að mati Landsbankans. Peningastefnunefnd Seðlabankans tekur ákvörðun um stýrivexti næstkomandi miðvikudag.

„Gangi áætlanir um niðurskurð í ríkisfjármálum eftir er nauðsynlegt að peningastefna Seðlabankans taki mið af þeim samdráttaráhrifum sem hljótast munu af því. Seðlabankinn hefur að undanförnu staðið fast við spá sína um að efnahagsbatinn muni hefjast á seinni helmingi ársins. Reynist það rétt er sá bati hinsvegar afar veikburða og háður því að fjárfesting og einkaneysla aukist. Hvorugt virðist hinsvegar líklegt að gangi eftir við núverandi aðstæður," segir í tilkynningu frá Landsbankanum.

Þar segir að þvert á móti hafi óvissa varðandi stórframkvæmdir aukist og væntingar neytenda hafi hríðfallið að undanförnu. „Of mikil áhersla hefur verið á að halda vöxtum háum til að laða að fjárfestingu í íslenskum ríkisskuldabréfum á sama tíma og hátt vaxtastig vinnur gegn atvinnuvegafjárfestingu jafnt innlendra sem erlendra aðila."

Hagfræðideild Landsbankans telur líklegt að stýrivextir muni lækka um a.m.k. 1½ prósentustig þar til að vaxtalækkunarferlinu lýkur. „Mikill slaki í efnahagslífinu kallar á að um helmingur þessa svigrúms verði nýttur nú þegar og stýrivextir lækkaðir um 0,75 prósentustig en í framhaldinu verði stigin smærri skref samfara hverjum áfanga afnáms gjaldeyrishaftanna."