Vöruskipti hagstæð um 11,5 milljarða í mars

Í marsmánuði voru fluttar út vörur fyrir 52,9 milljarða króna og inn fyrir 41,4 milljarða króna. Vöruskiptin í mars, reiknuð á fob verðmæti, voru því hagstæð um 11,5 milljarða króna. Í mars 2009 voru vöruskiptin hagstæð um 18,6 milljarða króna á sama gengi. Þetta kemur fram á vef Hagstofu Íslands.

Fyrstu þrjá mánuðina 2010 voru fluttar út vörur fyrir 136,0 milljarða króna en inn fyrir 104,7 milljarða króna. Afgangur var því á vöruskiptunum við útlönd sem nam 31,3 milljörðum en á sama tíma árið áður voru þau hagstæð um tæpa 28,8 milljarða á sama gengi. Vöruskiptajöfnuðurinn var því 2,6 milljörðum króna hagstæðari en á sama tíma árið áður.

Fram kemur á vef Hagstofunnar að fyrstu þrjá mánuði ársins 2010 var verðmæti vöruútflutnings 1,5% meira á föstu gengi en á sama tíma árið áður. Sjávarafurðir voru 36,8% alls útflutnings og var verðmæti þeirra 1,3% meira en á sama tíma árið áður. Útfluttar iðnaðarvörur voru 58,9% alls útflutnings og var verðmæti þeirra 39,5% meira en á sama tíma árið áður. Aukning varð í verðmæti útflutnings iðnaðarvara, aðallega áls, en samdráttur varð í útflutningi á skipum og flugvélum.

Fyrstu þrjá mánuði ársins 2010 var verðmæti vöruinnflutnings 0,6 milljörðum eða 0,6% minna á föstu gengi en á sama tíma árið áður. Smávægileg aukning var í innflutningi fjárfestingarvara og neysluvara en á móti kom samdráttur í innflutningi á flutningatækjum.