Róbert Wessman meðal stærstu skuldara Glitnis

Róbert Wessman, fyrrverandi forstjóri Actavis, var með 22 milljarða króna útistandandi lán hjá Glitni banka, rétt fyrir hrunið, en aðeins ári áður seldi hann hluti sína í Actavis til Novators fyrir um það bil 11 milljarða króna. Stærstur hluti lánsins er að öllum líkindum glatað fé.

Sumarið 2007 keypti Novator, félag Björgólfs Thors Björgólfssonar, sem var stærsti hluthafinn í samheitalyfjafyrirtækinu Actavís, aðra hluthafa út úr fyrirtækinu með lánum frá Deutsche Bank í einni stærstu yfirtöku Íslandssögunna. Meðal þeirra hluthafa sem keyptir voru út var Róbert Wessman, þáverandi forstjóri Actavis. Róbert seldi hluti sína í Actavis og fékk fyrir það rúmlega ellefu milljarða króna.

Samkvæmt lánayfirliti Glitnis banka frá 30. september 2008 sem fréttastofa hefur undir höndum og fékk fyrir tilstuðlan vefsíðunnar Wikileaks, kemur fram að félög í eigu Róberts voru með rúmlega tuttugu og tvo milljarða króna útistandandi lán hjá bankanum, aðeins ári síðar.

Þetta þýðir að lánveitingar til Róberts voru meðal stærstu áhættuskuldbindingum bankans meðal einstaklinga. Ef þær eru skoðaðar í samanburði við aðra stóra viðskiptamenn Glitnis, má nefna að heildarlánveitingar til Icelandair Group, móðurfélags Icelandair, námu 17 milljörðum króna á sama tíma.

Róbert Wessman sagði í samtali við fréttastofu í dag að langstærstur hluti upphæðarinnar, 14-15 milljarðar króna, hafi verið lán til hlutabréfakaupa í Glitni banka. Hann hafi fengið átta milljarðar króna um það bil ári fyrir bankahrunið og afganginn aðeins viku fyrir þjóðnýtingu Glitnis, eða síðari hlutann í september. Róbert sagðist hafa lagt fram tryggingar sem námu þremur og hálfum milljarði króna m.a í formi hlutafjár í Actavis og persónulegra ábyrgða, og það hafi tapast. Róbert segist vera að kanna réttarstöðu sína vegna þessara viðskipta. Þá hafi hluti lánveitinganna verið vegna kaupa á hlutabréfum í þýska lyfjafyrirtækinu Mainsee. Þau bréf hafi verið seld og Glitnir fengið söluandvirðið sem veðhafi.